5-6 қыркүйек аралығында Ислам Ынтымақтастығы Ұйымының-COMCEC экономикалық және сауда ынтымақтастығы жөніндегі тұрақты комитеті ұйымдастырған семинар өтті. Шара қатысушы елдерде өзара түсіністікті арттыруға, көпжақты ынтымақтастықты орнатуға және адами және институционалдық әлеуетті нығайтуға бағытталған. Семинарға Қазақстан, Әзірбайжан, Иордания, Нигерия, Сауд Арабиясы аккредиттеу және стандарттау органдарының өкілдері, сондай - ақ ислам елдерін стандарттау жөніндегі институттардың-SMIIC және COMCEC ресми тұлғалары қатысты.
Семинардың мақсаты аккредиттеудің үйлестірілген жүйесі туралы ақпараттандыруды арттыру, жоба бойынша серіктес елдер арасында тәжірибе алмасу, сондай-ақ SMIIC қатысуымен көпжақты/өзара тану жолындағы кедергілер туралы хабардар ету болды. Сонымен қатар, семинар халал SMIIC сертификаттау тәсілі аясында ортақ жұмыс тілінің дамуына ықпал етуге бағытталған.
Ұлттық аккредиттеу орталығы бас директорының орынбасары Ержан Қарасаев қатысушыларды Қазақстан Республикасының Ұлттық аккредиттеу жүйесі, сертификаттау жөніндегі органдарды аккредиттеу үшін қолда бар ресурстар, халал өнімдер мен қызметтерді өндіру процесі, қабылданған стандарттар және жалпы мұсылмандардың рухани құндылықтарын сақтауға бағытталған Инфрақұрылым туралы хабардар етті.
Семинар барысында қатысушылар түрік аккредиттеу органының қызметі, халал сертификаттаудағы жалпы стандарттардың қажеттілігі мен маңызы, SMIIC-тің осы саладағы күш-жігері, сондай-ақ SMIIC аккредиттеу Кеңесі халал сертификаттарын әртүрлі елдер арасында өзара тану үшін жүргізген жұмысы туралы ақпарат алды. Сонымен қатар, OIC/SMIIC3:2019 стандарты - Халал сәйкестігін бағалау органдарын аккредиттейтін Халал аккредиттеу органдарына қойылатын талаптар және Халал сертификаттарын өзара тану процесінде маңызды рөл атқаратын Халал - ifhab аккредиттеу органдарының Ислам форумы туралы толық ақпарат берілді.
